دلالة البراويز في أحلام البنات

دلالة البراويز في أحلام البنات

                                                   أ د. عـادل كمـال خضـر

                                                             أستاذ علم النفس الإكلينيكي والتحليل النفسي

                                                     ووكيل كلية الآداب _ جامعة بنـها

  1. mail : adelkhedr@yahoo.com
  • السلام عليكم ورحمه الله وبركاته .. كيف أحوالك أستاذنا الفاضل لعلكم بخير وسعادة .. أنا حلمت قريب بهذا الحلم ممكن تفسيره بعد إذنك وآسفة لو بزعجك ..
  • حلمت إني ذهبت لمحل براويز .. وشفت واحدة مجهولة اشترت براويز فقلت أشوف هي اشترت إيه عشان ممكن اشتري زيها .. وجت اشترت برواز به سورة الإخلاص .. لكنه صغير كانوا بروازين وكل برواز في ورقة غلاف به .. شافتني وضربتي على ظهري .. وأنا أحرجت منها قوي ، ثم عملت نفسي بشوف باقي البراويز في المحل لكني شفتهم ولا كأني شفت حاجة.. ما التفسير ؟؟ …  اللهم اجعله خير وآسفة على إزعاجكم .. وربنا يخليكم ويكرمكم خالص التقدير والتحية . 
  • المحلل :- أهلا بك
  • الحالة :- أهلا بحضرتك معذرة على الإزعاج . 
  • المحلل :- عرفيني بنفسك ، سنك تعليمك عملك حالتك الاجتماعية ..الخ
  • الحالة :- أنا اسمي كريمة باحثة ماجستير  .. سني 29 سنة ..  لست
    متزوجة أو مخطوبة ولم أوفق في عمل حتى الآن . لكن فيه أمل أنى
    أتوظف عن  قريب .
  • المحلل :- وبالنسبة للزواج اتخطبتي قبل كده .
  • الحالة :- لا لم أتخطب ولا مرة .. اتقدم لي كثير بس مفيش نصيب . 
  • المحلل :- إيه سبب رفضك لهم .
  • الحالة :- مش عارفه والله  بتكون مقابلة واحدة  وبعدين لا يرجعوا  وكده
    يعني .. نصيب .. مش عارفه مفيش سبب محدد واضح لي .. وأحيانا
    هم اللي بيرفضوا ومش بيرجعوا .
  • المحلل :- إيه أكثر شيء بتفكري فيه باستمرار الأيام اللي فاتت .
  • الحالة :- تقريبا الموضوع ده  موضوع الخطوبة والزواج . 
  • المحلل :- فكري معايا بصوت عالي .. إيه اللي بتقوليه جواكي ؟
  • الحالة :- بقول حظي وحش وكل حاجة بتمناها لا تحدث وربنا غضبان عليَّ
    مع إني لم افعل في حد أي حاجة والله ..  وكتير بعيط .
  • المحلل :- في الأيام الماضية حضرتي فرح أو حد حكى لك عن زواج عروسين .
  • الحالة :- لا لا لا  والله الصيف ده سبحان الله مفيش حد أقارب لنا كان عنده
    أفراح ولم احضر أي فرح .. لكن واحدة صحبتي عزمتني على فرح في
    القاهرة يوم 9 سبتمبر وأنا من الشرقية ومش عارفه هروح ولا لا ..
    غير كده مفيش .
  • المحلل :- يعني أنتي ما تعرفيش العروسة ، ولا أصحاب الفرح .
  • الحالة :- لا أعرف العروسة ولا العريس أنا أعرف صحبتي .. وعرفتها من
    كام سنة من النت  وبينا صداقة قوية ..  كل ما انزل القاهرة ابلغها
    فتيجي تقابلني .
    وصحبتي دي أخت العريس .
  • المحلل :- هل فكرتي لماذا لم تعرض عليكي صديقتك الزواج من أخيها .
  • الحالة :- هو كان خاطب قبل كده من سنة وكتب كتابه لكن العروسة اتوفت.
    ودي عروسة جديدة .. أنا فكرت قبل ما يخطب أول مرة لكن بعد كده
    نسيتهم ونسيت الموضوع ولم أفكر فيهم نهائيًا .
    .  بس للأمانة أنا
    اتعرفت ع شاب من النت من فترة واتعلقت به جدا بس من 28 يوليو
    لغي صداقتي ع الفيس ومن يومها وأنا حزينة أوي أوي .. لغي
    الصداقة دون سبب واضح مع العلم إن في العيد هو اللي هناني بالعيد ..
    هو اللي بادر ومش أنا بس ده اللي حصل وده اللي مزعلني أوي
    .
  • المحلل :- وضحي لي أكثر الجزء ده : وجت اشترت برواز به سورة
    الإخلاص . لكنه صغير كانوا بروازين وكل برواز في ورقة غلاف به .
  • الحالة :- البنت لم أراها بالمنام بس هي كانت شارية بروازين ، والاثنين
    عليهم سورة الإخلاص وفي ورقتهم ،  بس البرواز مفتوح من فوق
    وكانوا صغيرين ومكتوب بالبروازين سورة الإخلاص .
  • المحلل :- طيب أنت مخلصة في علاقتك بربك ؟
  • الحالة :- الحمد لله وربنا يقدرني .. ختمت القران 3 مرات في رمضان
    وصمت رمضان و6 أيام من شوال ودي أول سنة أصوم 6 كاملين ..
    السنة اللي فاتت صمت 5 أيام من شوال بس .
     
  • المحلل :- يعني نقدر نقول إن بقالك سنتين بتجتهدي إنك تقربي لربك .
  • الحالة :- نعم ممكن الفترة الأخيرة أنا بقرا قرآن كتير .. الحمد لله ..   حتى
    ليس قاصر على شهر رمضان
    ...  ومع ذلك اللي حصل حصل ومفيش
    نصيب وحاسة إني في ابتلاء
    .
  • المحلل :- هل حاسيتي إن صديقتك جرحتك وهي بتقولك تحضري فرح أخوها على عروسة تانية غيرك .
  • الحالة :- أبدًا والله .. أصلا صحبتي صعبانه علي  لأنها لم تتزوج أيضًا ..
    وهي أصلًا أكبر مني كمان .
    والموضوع مش بفكر فيه نهائي .
  • المحلل :- هل حدث إنك عرفتي أو سمعتي إن واحدة اتجوزت من واحد هو
    أحسن منها بكثير وكنتي تتمني إنه يكون جوزك أنت
    .
  • الحالة : اللي جرحني وأثر في كتير إن الشاب اللي اتعرفت عليه حذف
    صداقتي  فجأة دون سابق إنذار أو سبب
    . 
  • المحلل :- ممكن يكون خطب واحدة ثانية أو اتجوز .
  • الحالة :- مش فاكرة الحكاية دي بس في الغالب لا لا .. أنا يمكن اللي مأثر
    في إني كل ما أحب واحد يروح مني .. الله أعلم بس كان مكلمني قبلها
    بأسبوع لم يكن في شيء .. وأسبوع لا يلحق يخطب أو يتزوج هذا
    الشاب
    .
  • المحلل :- ممكن يكون حب واحدة برضه على الفيسبوك وقطع علاقته بيكي.
  • الحالة :- بس حدث لي موقف قبلها بمدة .. كان لي زميل لي كان بيتمناني
    من فترة لكن لم يصرح لي .. وبعد ما اتزوج صرح لي إنه كان بيفكر
    بي بس بعد فوات الأوان .
    الله أعلم .. طيب تفسير الحلم إنه ممكن
    يرجع
    ..  ولا خلاص .
  • المحلل :- أنتي اللي جواكي عايزاه يرجع لك تاني .
  • الحالة :- يعني مش راجع خلاص .. طيب تفسير الحلم إيه ؟؟ أنا حلمته بعد
    ما تركني وراح
    .
  • المحلل :- قدرتي توصلي لتفسير الحلم من حوارنا مع بعض .
  • الحالة :- التفسير إني كنت بتمنى حاجة بس مش مكتوبة لي وملك واحدة
    تانية  حضرتك تقصد كده
    .
  • المحلل :- نعم .
  • الحالة :- ألف شكر لحضرتك .. يعني بلاش أعيش في الأوهام وانزل الواقع. طيب ربنا ممكن هيعوضني عن اللي راح ولا هفضل حزينة كتير .

 

  • التفسير :
  • حلمت إني ذهبت لمحل براويز .. ( ومحل البراويز هنا رمز للفيسبوك ) ، وقد أصبح وسيلة التعارف بين الشباب خاصة ، وكذا الحب والزواج .. وهو محل بديل لمحل الإقامة ، والبرواز على الفيسبوك متوفر فيه الصورة الشخصية لصاحب المحل ( وهي صفحة الشخص على الفيسبوك ) .
  • وشفت واحدة مجهولة ( العروسة اللي هتتجوز أخو صديقتك ) اشترت براويز ( العريس ) ، والزواج صفقة فيها بيع وشراء ، والعريس يقول أنا جاي شاري .. وأهل العروسة يقولون احنا بنشتري راجل .
  • فقلت أشوف هي اشترت أيه عشان ممكن اشتري زيها ( عريس ) .
  • وجت اشترت برواز به سورة الإخلاص ( أنتي تري أن البنت المخلصة في علاقتها بربنا ، ربنا بيرزقها بابن الحلال ) .. لكنه صغير كانوا بروازين وكل برواز في ورقة غلاف به.. ( وبيجيلها عرسان كثير وهي اللي بتختار البرواز اللي يعجبها  صغيري السن ..  والبرواز أيضا رمز للسنة ـ وأنت اجتهدتي في العبادة والتقرب إلى الله وأخلصتي له منذ عامين مضت ) .
  • شافتني وضربتي على ظهري ( أنت تعاقبين ذاتك لاعتقادك بأن سلوكك على الفيسبوك حرام وإنك كمان باصة للعروسة وحابة تاخدي العريس منها ، والعقاب أيضًا جاء واقعيًا بالضرب على الظهر – بالقفا –  من الشاب اللي أنتي اتعرفتي عليه وألغى صداقته بك )  .
  • وكونك اتحرجتي من العروسة قوي ( تدل على إنك اتكسفت من نفسك ، لأنك تنظرين لما في يد غيرك ، وجاء ذلك بعد الإحباط الذي عشتيه بعد إلغاء حبيبك لصداقته معك ) ثم عملت نفسك بتشوفي باقي البروايز ( الشباب ) في المحل ( على الفيسبوك ) .. لكنك شفتيهم ولا كأنك شفت حاجة .. ( لأنك ما زلتي متعلقة بحبيبك الذي ألغي صداقته معك على الفيسبوك .. وذلك على أمل أن الحبيب يرجع تاني لك ) ..
  • هكذا علاقات الحب على الفيسبوك .. دخولها سهل ، والخروج منها يكون ذهابًا بلا عودة .

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s