أهمية الأحلام في وضع حلول لمشكلات حياتنا
أ.د/ عادل كمال خضر
أستاذ علم النفس الإكلينيكي والتحليل النفسي
وكيل كلية الآداب ــ جامعة بنــها
mail : adelkhedr@yahoo.com
نعاني بصفة مستمرة من أحداث الحياة الضاغطة والخبرات المحبطة التي تعكر علينا صفو حياتنا ، فثمة مشاكل غير محلولة تلح على تفكيرنا وتقتحم شعورنا مرات ومرات ، ونحن نحاول الهروب منها لكنها تلاحق أفكارنا وتطل علينا رغم معاناتنا من تذكر أحداثها .. ويستمر الحال في نومنا عبر أحلامنا حيث تتكرر نفس الخبرات والأحداث المؤلمة في محاولة لوضع الحل الذي عجز عنه الواقع .. وفيما يلي نعرض حُلم لطالبة جامعية فقدت التابلت ، وتحاول أن تجد مخرجًا كي يتقبل والدها هذا الوضع .. ونذكركم بأن طريقتي في تفسير الأحلام التي خلصت إليها هي أن يتم تفسير الحلم من خلال جلسة إرشاد نفسي بين المحلل والحالة ، وقد تم ذلك على الوجه التالي :
– الحالة : السلام عليكم أستاذي الفاضل لو تسمح حضرتك أن تفسر لي هذا الحلم .
– المحلل : وعليكم السلام ، اكتبي حلمك بالتفصيل . ثم عرفيني بنفسك ونبذة عن حياتك الشخصية وبعدين نتواصل على الفيس .
– الحالة : أنا صفاء 21 سنة ، طالبة جامعية .. وحلمت الحلم التالي :
” إن والدي زعل جامد جدا مني لان مخبيه أمر عليه والأمر دا ان تابلت بتاعي اتسرق وهو عرف وزعل جامد واتعصب عليا وكان عايز يضربني فقلت له واحده صحبتي قالتلي لو انا اللي كان تابلت بتاعي ضاع كان والدي قالي فداكي تابلت إنما أنت عامل على الفلوس يابابا مش خايف عليا ونمت وأنا معيطه .. وموت والناس ماشين بيا في الجنازه .. بعد مامت شوفتني في الحلم وأنا ميته بصلي وشايفه الناس كلها بس مفيش حد شايفني ” .
– انا اكبر اخواتي ودايما أنا بكون جمب بابا وماما في مشاكلهم وحاليا احنا في أزمه ماليه بس الحمد لله حالنا تمام .. بس أنا تفكيري مشغول ديما بالدعاء لبابا إن ربنا يفك أزمته ومتوترة .
– لو تكرمت حضرتك أستاذي اعرف بس تفسير إن أنا بصلي وأنا ميتة .
– المحلل : بداية أعرفك أن تفسير الحلم هيكون من خلال الحوار ما بيننا عشان كده أنت كمان هتساعدي في التفسير .. ولازم تتكلمي بكل صدق.
– الحالة : حاضر أستاذي الفاضل .
– المحلل : الوالد بيشتغل إيه؟
– الحالة : موظف حكومي .
– المحلل : هل حدث في الأيام الماضية إنك عملتي حاجة ومخبياها عن أبوكي ؟
– الحالة : ضياع التابلت ماما عارفه بس بابا لا يعرف .
– المحلل : أنت متعلقة بأبوكي أكثر من أمك .
– الحالة : نعم أنا دايما بدعيله وبابا متدين وبحبه جدا .
– المحلل : أنت اللي طلبتي أنه يجيب لك تابلت ؟
– الحالة : ماما هي اللي قالت هنجيب تابلت وحصلت مشكله وبابا قال التابلت ثمنه غالي لو اشتريناه وضاع أو اتسرق هيكون إيه الحل وأنا عيطت وبابا اشتراه وكان متشدد في الأول علي إن مفيش حد يخرج بيه وبعد كدا ترك لنا الحرية .
– المحلل : بابا لما يزعل منك بيتعامل معاكي إزاي ؟
– الحالة : هو بابا عقابه بالكلام صعب جدا وممكن الخصام .. احنا ثلاث بنات نادر جدا أما يضربنا .. ومن زمان تقريبا في صف الثاني الإعدادي آخر مره اضربت ..
– المحلل : والأزمة المالية اللي بيمر بيها والدك كانت قبل ما يشتري التابلت ولا بعد ما اشتراه .
– الحالة : بعد ما اشتراه .
– المحلل : أنت نادمانه أنه زنق نفسه واشترى التابلت ، وأن ممكن يكون أنت تسببتي في هذه الأزمة المالية .
– الحالة : هو وقت ما اشتراه الحمد لله كان المال متوفر معاه حابه أقول لحضرتك إن احنا بنبني بيت جديد واختي في صيدلة خاصة وبابا يعني بيتعب جدا في الفلوس .. فعلا ممكن أنا ندمانه بس والله كان غصب عني إن التابلت اتسرق .
– المحلل : يعني أنت تستاهلي الضرب .
– الحالة : لا مش لدرجة الضرب بس لو الضرب هيرضي بابا ويخليه راضي عني مستعدة اضرب .
– المحلل : عيطي لما التابلت اتسرق .
– الحالة : انهرت من العياط وكنت مش قادره أقف وكنت رايحه الامتحان .
– المحلل : حسيتي إن الموت أرحم من تعرضك للموقف ده .
– الحالة : هو اللي أنا حسيته لما هديت مع نفسي إن دا درس من ربنا بيقولي إن قلبي متعلق بالدنيا واني عيطت علي حاجه تافهه عياط كأن حد مات ليا كان نفسي فعلًا أموت بس ماقولش لبابا إن حاجه هو تعب فى فلوسها وضاعت مني .
– المحلل : ممكن تفسري الحلم بتاعك ؟
– الحالة : إزاي يا دكتور ؟
– المحلل : راجعي الحوار بتاعنا تاني وحاولي تكتبي تفسير لحلمك .
– الحالة : هو أنا دايما بدعي ربنا إن أنا ضللت طريقي وفوضت أمري إليه وكنت بصلي قيام الليل بس مش دايما هو ممكن يا دكتور تفسير الحلم إن أحسن من صلاتي واعلق قلبي بربنا واترك له كل شيء .
– المحلل : هل التابلت كان عليه حاجات تتعلق بحياتك الشخصية .
– الحالة : كان عليه صورنا أنا وأخواتي وأقاربي .. وكان له 3 باس ورد .. وبابا شاف صورنا وقال عشان خاطري امسحوا الصور عشان ماحدش غريب يشوفها وبعدها اتسرق .
– المحلل : وده يعبر عن الجزء الأخير من الحلم ” وانا ميته بصلي وشايفه الناس كلها بس مفيش حد شايفني ” ، فبعد ما اتسرق التابلت أنت تعتقدي بأن الناس كلها هتشوف صورك أنت وأسرتك .. يعني أنتي كنتي بتدعي أن ما حدش يشوف صورك .. والصلاة دعاء .
– الحالة : ربنا يبارك في حضرتك يا دكتور .. والله أنا في صراع جامد جدا وكنت خايفه جدا .
– المحلل : صراع ليه وخايفة من إيه ؟
– الحالة : صراع بين نفسي وعدم تركيزي في الصلاة ومتوترة وخايفه لما بابا يعرف وعندي امتحان بكرا مش عارفه أذاكر وكل اما أشوف بابا أخاف يسألني عن تابلت صراع عشان مش عايزه اكذب عليه أبدا .
– المحلل : متفكريش في أي حاجة دلوقتي غير في مذاكرتك ، وقربي لربنا وادعي له أنه ييسر لك أمورك ، ودعي أمر التاب وكيفية معالجة هذه المشكلة لبعد الانتهاء من الامتحانات .
– الحالة : حاضر يا دكتور بس للأسف بكرا آخر يوم امتحاناتي وأجازه بابا كمان هضطر إن اقوله .. باذن الله هواظب في الصلاة أكتر .
– المحلل : أنت كنت قطعتي الصلاة بعد التابلت ما ضاع؟
– الحالة : لا والله كنت بصلي بس تابلت كان شاغل تفكيري في صلاه ودعيت ربنا جدا بس حسيت إن أنا مذبذبه بلح على ربنا إن تاب يرجع وشوية ادعي ربنا وأقول لو شر ليا يبعده عني ولو خير ليا يرجعه ليا .
– المحلل : لكن أنت مش راضية عن صلاتك ، وللمرء ما عقل من صلاته .. وتعتقدي أن صلاتك لا تقبل لأنه لا صلاة بعد الموت .
– الحالة : فعلا مش راضيه عن صلاتي ومش حاسه فيها بخشوع وقلبي تعب جدا ومش مرتاحه ..بس مداومه على قراءة القرآن وبرتاح جدا لما بقرأ .
– المحلل : ربنا يوفقك يا صفاء ويسعد أيامك .
– الحالة : يارب يا دكتور ويبارك في عمر حضرتك ويجعلك من أهل الجنة بعد عمر طويل .
– الخلاصــة : الحلم أعطى للحالة بعض الحلول ومنها : الحل الأول : أنه إذا تعصب عليها والدها أو هم بضربها بعد علمه بأن التابلت ضاع ، يمكنها أن تكسبه في صفها بوضعه في مقارنة مع والد صاحبتها بأن تقول له كما قالت في الحلم: ” واحده صحبتي قالتلي لو أنا اللي كان تابلت بتاعي ضاع كان والدي قالي فداكي تابلت إنما أنت عامل على فلوس يابابا مش خايف عليا ” .. والحل الثاني : أن تظهر الزعل والبكاء ، كما اتضح في الحلم ” ونمت وأنا معيطه ” … والحل الثالث : تمني الموت ، حيث تقول : ” وموت والناس ماشين بيا في الجنازه “.. وبالموت تسقط التهمة ، وأيضًا تشعر الوالد بالذنب لكونه لم يصفح عنها وكان سبب في وفاتها.. والحل الرابع: أنها تدعو ربها في صلاتها بأن يعيد لها التابلت الذي سرق ” بعد ماموت شوفتني في الحلم وأنا ميته بصلي ” .. والحل الخامس : أن تطمنه بإنه لن يستطيع السارق مشاهدة صورها لأن التابلت محمي بباسوورد .. حيث تدخل ميكانيزم الإنكار ” وشايفه الناس كلها بس مفيش حد شايفني ” .
تفسير الأحلام ودلالة رموز الحلم 