أهمية جلسة التحليل النفسي لتفسير الحلم

أهمية جلسة التحليل النفسي لتفسير الحلم

 

أ.د/ عادل كمال خضر

أستاذ علم النفس الإكلينيكي والتحليل النفسي

عميد كلية الآداب ــ جامعة بنــها

 

        لا شك أن جلسة التحليل النفسي بين المحلل  وصاحب الحلم  أصبحت أمرًا ضروريًا لا غنى عنه من أجل الوصول إلى تفسير الحلم ، ذلك أن تبادل الحوار بين المحلل والحالة حول عناصر الحلم ورموزه لمن الأهمية بمكان لفهم الدلالات الخاصة بأحداث الحلم ، حيث يستخرج الحالم من تاريخ حياته ما يمكن به فهم الحلم ورموزه .. وهذا ما يتضح من تفسيرنا للحلم التالي :

  • الحالة : السلام عليكم .
  • المحلل : وعليكم السلام .
  • الحالة : في حلم ممكن حضرتك تفسرهولي : كنت في الحرم المكي ومستنية العصر يأذن وكنت صايمة فنمت في المسجد وحلمت إن واحد زميلي قاعد مع بابا قدام المدرسة الابتدائية بتاعتي وبيحسبوا نسبة أو حاجه .. فلما قربت لقيت ماما واقفة جنبهم وبتقولي شوفي أخوكي متضايق ليه ( قصدها علي زميلي ده ) فسألته وراني ورقة امتحان وكان امتحان عربي وكان في سؤال فقولتله الإجابة جهة ، قالي  اه صح جهة بس كان متضايق ( تقريبا حلها اتجاه ) وصحيت علي صوت آذان بس ماكنش في أذان في الحقيقة .
  • المحلل : عرفيني بنفسك .
  • الحالة : أنا طالبه خلصت الثانوية العامة وداخلة إن شاء الله الجامعة السنة دي ، مصرية ، عمري 18 عامًا .
  • المحلل : كلميني عن أسرتك .
  • الحالة : أسرتي مكونة من والدي ووالدتي وأنا وإخواتي خمسه ، أربع بنات وولد . وترتيبي بين أخوتي الأولى .
  • المحلل : اتخطبتي قبل كده .
  • الحالة : لا .
  • المحلل : كنتي منتظرة حد تعرفيه هيتقدم لك .
  • الحالة :حد اتقدم بس اترفض .
  • المحلل : اترفض ليه .
  • الحالة : علشان الدراسة لسه بدري جدًا .
  • المحلل : هو بيشتغل إيه .
  • الحالة : محاسب بس وقتها مكانش لسه اتعين .
  • المحلل : يعني اترفض عشان مكنشي بيشتغل
  • الحالة : بس مش هو ده الشخص اللي شوفته في الحلم .
  • المحلل : طب والشخص اللي أنتي شفتيه في الحلم تعرفيه .
  • الحالة : أيوة كان زميلي في المدرسة وكان بياخد معايا درس في بيتنا .
  • المحلل : كنتم مع بعض من ابتدائي .
  • الحالة : لا من أولي إعدادي ومدرسة الابتدائي والإعدادي جنب بعض .
  • المحلل : أنتي حبتيه أو فكرتي أنه يخطبك .
  • الحالة : حب لا بس هو تافه شوية بيتكلم عن الخطوبة دي ببساطه .
  • المحلل : يعني هو بيحسب حسبة غلط .. هل لمح لك بالخطوبة .. وأنت شايفة إن أبوكي لا يمكن يوافق عليه .
  • الحالة : ممكن أبويا يوافق علشان هو دخل طب بس أنا شايفاه تفكيره سطحي .
  • المحلل : هل أمك أو أبوكي شايفين أنه عريس مناسب ليكي .
  • الحالة : أيوه .. لأنه من الظاهر محترم وكمان في كلية قمة يعني له مستقبل .
  • المحلل : لكن أنت شايفاه زي أخوكي .. مش زوج مستقبل .
  • الحالة : أيوه .
  • المحلل : هل سبق إنك حطتيه في امتحان وفشل فيه .. وسقط من نظرك مثلا .
  • الحالة : أنا كنت شايفاه زي قدوة وكنت محترماه جدًا بس اتحطينا في موقف وهو غلطان .. بس كان بيتصرف باستهتار جدًا وحسيت أد إيه هو تافه .
  • المحلل : تقصدي  إيه  بــ ( تقريبا حلها اتجاه ) .
  • الحالة : هو كتب الإجابة اتجاه بدل جهة .. السؤال اللي في الامتحان كان له اختيارات منهم جهة واتجاه أنا قولتله إن الإجابة جهة  وهو كان اختار اتجاه .
  • المحلل : وإيه الفرق بين جهة واتجاه في اللغة العربية .
  • الحالة : الحقيقة مش عارفه بس يمكن جهة مركزة اكتر علي هدفي في الحياة .
  • المحلل : وإيه هو هدفك في الحياة .
  • الحالة : أكون دكتورة شاطرة وارفع رأس أهلي .
  • المحلل : يعني أنتي دخلتي كلية الطب .
  • الحالة : إن شاء الله .. أنا قدمت طب أسنان .
  • المحلل : وصلتي لتفسير الحلم ؟
  • الحالة : أنا اتلغبطت جدًا .
  • المحلل : ليه ؟
  • الحالة : أنا كنت فاكراه حاجه بسيطة إن ممكن يجيله في امتحان الثانوية حاجه زي كدا ويغلط فيها.. بس واضح إن التفسير غير كدا خالص . ممكن حضرتك تقولي ؟
  • المحلل : عايزك أنت اللي تفسري حلمك الأول .
  • الحالة : يعني ده مجموع أفكاري عنه مثلًا بابا وماما ممكن يكون عاجبهم بس أنا شايفه إنه مش محدد جهته !!! وماما قالت أخوكي لأني شايفاه كده .. وكان بيحسب نسبة مع بابا .
  • المحلل : كويس .
  • الحالة : طب والمدرسة ؟
  • المحلل : المدرسة يعني أنتم لسة صغيرين وهتدخلوا أولى طب ، يعني لسة بدري ولم يحن الأوان .. وكل عصر له آذان .
  • الحالة : يعني إيه كل عصر له آذان ؟
  • المحلل : يعني نربط صلاة العصر .. والأذان في نهاية الحلم .. بهذا المثل كل وقت له آذان .. وأنتي كنتي مستنية العصر وهو منتصف عمر الإنسان بمعنى سن الشباب آنذاك يكون الزواج .
  • الحالة : كده تمااام .
  • المحلل : مقتنعة بالتفسير .
  • الحالة : ايون .

 

خالص تحياتي

                 أد. عادل كمال خضر

  1. mail : adelkhedr@fart.bu.edu.eg

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s